ភ្នំពេញ៖(ខ្មែរថាមស៍)ខណៈការបោះឆ្នោតក្រុមប្រឹក្សាឃុំ-សង្កាត់ខិតជិតមកដល់ក្រុមអង្គការសង្គមស៊ីវិលនិងសមាគមមិនមែនរដ្ឋាភិបាលនៅកម្ពុជាបានប្រកាសចាប់ដំណើរការបន្ទប់ស្ថានការណ៍ស្ដីពីការបោះឆ្នោតឆ្នាំ២០១៧ដោយគ្រោងដាក់ពង្រាយអ្នកសង្កេតការណ៍ជាង ២ម៉ឺននាក់ នៅតាមការិយាល័យបោះឆ្នោតទូទាំងប្រទេស។
បន្ទប់ស្ថានការណ៍ស្ដីពីការបោះឆ្នោតឆ្នាំ២០១៧ ត្រូវបានប្រកាសដំណើរការចាប់ពីថ្ងៃទី២៥ ខែកុម្ភៈ រហូតដល់ខែកក្កដា ឆ្នាំ២០១៧។ បន្ទប់នេះ គឺជាទីតាំងប្រមូលផ្តុំនៃសមាជិកសម្ព័ន្ធកំណែទម្រង់ការបោះឆ្នោត (ERA) អង្គការសង្គមស៊ីវិលឯករាជ្យ និងអ្នកជំនាញ ដើម្បីប្រមូលផ្តុំធនធាន បង្កើនសមត្ថភាព និងរួមចំណែកសហការជាមួយមូលនិធិ ឬគាំទ្រ ដើម្បីដំណើរការផែនការដាក់ពង្រាយអ្នកសង្កេតការណ៍ ក្នុងស្រុកនៅថ្ងៃបោះឆ្នោត។
បន្ទប់នេះ ក៏ជាវេទិកានៃការសហការគ្នា ដែលអាចឲ្យមានការចែករំលែក និងធ្វើបច្ចុប្បន្នភាពព័ត៌មាន បង្កើតឲ្យមានការសិក្សាវាយតម្លៃ និងផ្ទៀងផ្ទាត់លទ្ធផលនៃការបោះឆ្នោត ព្រមទាំងការធ្វើអន្តរាគមន៍ភ្លាមៗចំពោះបញ្ហា និងហានិភ័យនៃភាពអសន្តិសុខ និងការយាយី ដែលទាក់ទងនឹងស្ថានភាពបោះឆ្នោតនាពេលខាងមុខនេះ។ នេះបើតាមសេចក្តីប្រកាសព័ត៌មាន ចុះថ្ងៃទី២៥ ខែកុម្ភៈ ឆ្នាំ២០១៧។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (NICFEC) និងជាសមាជិកនៃសម្ព័ន្ធកំណែទម្រង់ការបោះឆ្នោត (ERA) បានឲ្យដឹងថា បច្ចុប្បន្នបន្ទប់ស្ថានការណ៍នេះ មានអង្គការជិត ៥០ ជាសមាជិក និងបន្តបើកឲ្យមានការចូលរួមពីអង្គការ សមាគម និងសហជីពផ្សេងៗទៀត ដើម្បីរួមចំណែកក្នុងកិច្ចការងារ តាមដានដំណើរការបោះឆ្នោតក្រុមប្រឹក្សាឃុំ-សង្កាត់ ដែលនឹងធ្វើឡើងនៅថ្ងៃទី៤ ខែមិថុនា ខាងមុខនេះ។
លោក បានបន្តថា ខុសពីបន្ទប់ស្ថានការណ៍កាលពីឆ្នាំ២០១៣ ដែលបង្កើតមុនថ្ងៃបោះឆ្នោតថ្នាក់ជាតិតែប៉ុន្មានថ្ងៃ សម្រាប់បន្ទប់ស្ថានការណ៍ថ្មីនេះ គឺចាប់ដំណើររយៈពេលវែង ដើម្បីបណ្តុះបណ្តាលអ្នកសង្កេតការណ៍ និងតាមដានស្ថានការណ៍នៃដំណើរការទៅរកការបោះឆ្នោតក្រុមប្រឹក្សាឃុំសង្កាត់ និងការបោះឆ្នោតថ្នាក់ជាតិ នៅថ្ងៃខាងមុខ។
លោកថា៖ «ក្រុមអ្នកសង្កេតការណ៍ នឹងប្រមូលផ្តុំនៅទិន្នន័យ នៃការរាប់សន្លឹកឆ្នោតតាមការិយាល័យទាំងអស់ ដែលពួកគេត្រូវបានបញ្ជូនទៅ ហើយបន្ទប់ស្ថានការណ៍ នឹងផ្សាយនូវព័ត៌មានពីលទ្ធផលទាំងនោះ តាមដែលអាចធ្វើបានបន្ទប់ស្ថានការណ៍ ក៏នឹងរៀបចំរបាយការណ៍បឋមពីលទ្ធផលនៃការបោះឆ្នោត ដោយគ្រោងចេញផ្សាយនៅយប់ថ្ងៃដដែល ដែល គ.ជ.ប. ប្រកាសពីលទ្ធផលតែម្តង»។
បើតាមលោក សំ គន្ធាមី បន្ទប់ស្ថានការណ៍ នឹងដាក់ពង្រាយអ្នកសង្កេតការណ៍ប្រមាណ ២ម៉ឺន ២ពាន់ ដែលនឹងត្រូវចំណាយថវិកា ២២ដុល្លារ សម្រាប់អ្នកសង្កេតការណ៍ម្នាក់។ លោកថាថ្មីៗនេះសហភាពអឺរ៉ុប បានសន្យាផ្តល់ប្រាក់ជំនួយក្នុងកិច្ចការងារដល់អ្នកសង្កេតការណ៍ប្រមាណ ១ម៉ឺន ២ពាន់នាក់ ខណៈដែលសមាជិកនៃបន្ទប់ស្ថានការណ៍ បានបង្កើតនូវមូលនិធិសប្បុរសធម៌ ដើម្បីស្វះស្វែងរកថវិកាផ្គត់ផ្គង់បន្ថែមទៀត។
កាលពីថ្ងៃសុក្រ សបា្តហ៍មុន លោកនាយករដ្ឋមន្ត្រី បានប្រកាសប្ដេជ្ញាការពារដំណើរការបោះឆ្នោតឲ្យប្រព្រឹត្តិទៅយ៉ាងទៀងទាត់ ប្រកបដោយសុវត្ថិភាព សេរីភាព យុត្តិធម៌ ត្រឹមត្រូវ និងទទួលយកបាន និងថា ការបោះឆ្នោត នៅថ្ងៃទី៤ ខែមិថុនា ឆ្នាំ២០១៧ នេះ ត្រូវតែជាការបោះឆ្នោតដ៏ត្រឹមត្រូវមួយ ហើយធានាសុវត្ថិភាពសម្រាប់បេក្ខជនទាំងអស់នៃបណ្តាបក្សនយោបាយ។
គ.ជ.ប. នឹងទទួលចុះឈ្មោះចាប់ពីថ្ងៃទី១៥ ខែកុម្ភៈ រហូតដល់ថ្ងៃទី២៤ ខែឧសភា សម្រាប់អ្នកសង្កេតការណ៍ជាតិរីឯអ្នកសង្កេតការណ៍អន្តរជាតិ ត្រូវចាប់ផ្ដើមទទួលចាប់ពីថ្ងៃទី១៥ ខែកុម្ភៈ រហូតដល់ថ្ងៃទី៣០ ខែឧសភា។
សមាជិក និងជាអ្នកនាំពាក្យ គ.ជ.ប. លោក ហង្ស ពុទ្ធា ដែលជាអតីតសមាជិកបន្ទប់ស្ថានការណ៍ដែរនោះ ស្វាគមន៍ទៅនឹងកិច្ចសហការរបស់បន្ទប់ស្ថានការណ៍ និងជំរុញឲ្យអ្នកសង្កេតការណ៍ ទទួលបាននូវការបណ្តុះបណ្តាលពេញលេញ ត្រឹមត្រូវ ក្នុងកិច្ចការងារនេះ។ លោកថា៖ «កាលណាមានភាគីច្រើន ចូលរួមអង្កេតការក្នុងដំណើរការបោះឆ្នោតនេះ គឺអាចជួយធានានូវតម្លាភាព និងភាពត្រឹមត្រូវចំពោះលទ្ធផលបោះឆ្នោត ហើយក្នុងនោះ គណបក្សដែលឈ្នះ គឺឈ្នះដោយសប្បាយចិត្ត ចាញ់ គឺចាញ់ដោយអស់ចិត្ត អ៊ីចឹងយើងឈប់បារម្ភហើយ»។
ក្រោយការបោះឆ្នោតថ្នាក់ជាតិ ឆ្នាំ២០១៣ បន្ទប់ស្ថានការណ៍ឃ្លាំមើលការបោះឆ្នោត បានរកឃើញនូវភាពមិនប្រក្រតីមួយចំនួន ពាក់ព័ន្ធទៅនឹងឈ្មោះស្ទួន បញ្ហាជនជាតិវៀតណាម មានសិទ្ធិបោះឆ្នោត និងភាពមិនប្រក្រតីចំពោះការរាប់សន្លឹកឆ្នោតផងដែរ ប៉ុន្តែការរកឃើញទាំងនេះ ត្រូវបានមន្ត្រីរដ្ឋាភិបាល ដឹកនាំដោយគណបក្សកាន់អំណាចច្រានចោល ចំណែកគណបក្សប្រឆាំង បានទាមទារឲ្យសើរើការបោះឆ្នោត និងបោះឆ្នោតឡើងវិញជាដើម៕
ប្រភព៖ Khmertimekh